Loading ...
Sorry, an error occurred while loading the content.

2022SETULAGLIDS (2010)

Expand Messages
  • Ralph Midgley
    Sep 1, 2010
      FLENEF   BEVÜNETIK  VOLAPÜKA
       
      Tü del 1-id setula, yela 2010.
       

      O Volapükaflens Valöpo!

       

                  Suno juls oprimons yeli kadämik nulik.   Pösods mödik ovisitons lärnodis alsotik ad dunön kisi-li?   Ad lärnön, klülabiko!   Ab ad lärnön kisi-li?   Ad reidön, ad penön, ad kalkulön.   Ed osaidos-li atos?

       

                  Dugäl verik binädon me daglof pösoda lölöfik, sevabo:   1)   koapik;   2)  tikälik;   3)  lanöfik.

       

                  Dil koapik binon mu veütik, bi lifobs in züamöp stöfik.   Ab plä atos, dalabobs legivoti tikäla, e kanobs i tikön.   Lätiko, labobs dili lanöfik.   No sevobs mödikosi tefü dil at, ab nemödikans gebons oni, bi dub neküpäl  ti eglömons legivoti somik.   Ab pösod lölöfik sevon ad gebön dilis kil at sagato e netuiko.   Pösod, kel pareigon fa dil bal no binon lölöfik, bi leigavet pösoda somik binon döfik.

       

                  Dil koapik tefon koapi e dunodis ota.   Samo, lif nimas e näsäkas binon löliko koapik.   Ab binobs plu ka nims e näsäks.   Too dabinons pösods, kels jäfikons cifo me koap.   Danöfo binons nemödiks, bi  mens mödikün  i gebons dili tikälik okas :  betikons dinis, studons, labons lifi täläktik.   Tefü dil lanöfik, nemödikans jenöfo seividons oni.   Neai tikons dö lif geilikum, dö tikamagots sublimik, dö rig lifa it; vögi ninik, kel geidon obis da lif,  no  lilons.

       

                  Dugäl verik no jäfon me dil te bal dilas at, ab zeilon ad sevädükön tidäbi tefü dabin dilas nog telas.   Sosus sevoy dö dabin otas, kanoy steifülön ad gebön onis ad fomön pösodi lölöfik, sevabo : ad dakipön baitoni vü ons ma veüt alik otas.  Ekö vobod, kel anikna dulon dü yels mödik.

       

                  Valikosi Gudikün Oles ed Olikanes

       

                              sedom

       

                                  Ralph