Loading ...
Sorry, an error occurred while loading the content.

n-ro 90 - Gazetaraj komunikoj de UEA

Expand Messages
  • Universala Esperanto-Asocio
    =========================================================================== GAZETARAJ KOMUNIKOJ DE UEA N-ro 90 (2000-08-10)
    Message 1 of 1 , Aug 10, 2000
    • 0 Attachment
      ===========================================================================

      GAZETARAJ KOMUNIKOJ DE UEA N-ro 90 (2000-08-10)

      ===========================================================================

      Enhavo: 1. Kvar novaj Honoraj Membroj en UEA
      2. Premio Deguchi al Rob Moerbeek
      3. Subvencio Cigno al Indighenaj Dialogoj
      4. HEJMA VORTARO represita

      ---------------------------------------------------------------------------

      KVAR NOVAJ HONORAJ MEMBROJ EN UEA

      En sia kunsido en Tel-Avivo la Komitato de UEA distingis kvar aktivajn
      esperantistojn per honora membreco de la Asocio: Juan Eduardo Bachrich
      (Venezuelo), Elvira Fontes (Brazilo), Edwin de Kock (Sud-Afriko/Usono)
      kaj Sija van Wijngaarden (Nederlando).

      Juan Bachrich (1921) estas jam de kvin jardekoj la motoro de la movado en
      sia lando kaj longtempe peranto de UEA. Elvira Fontes (1916) ricevis la
      honorigon pro siaj meritoj kiel Esperanto-instruistino. Edwin De Kock
      (1930) certigis sian lokon kiel unu el la plej elstaraj poetoj de nia
      lingvo jam per sia debuta kolekto en 1961. Sija van Wijngaarden (1920)
      laboris kiel oficistino en la Centra Oficejo de UEA tri jardekojn ghis
      sia emeritigho en 1985.


      * * * * * *


      PREMIO DEGUCHI AL ROB MOERBEEK

      En la Fermo de la Tel-Aviva UK okazis por la 14-a fojo la transdono de unu
      el la plej prestighaj premioj de la Esperanto-movado, Premio Onisaburo
      Deguchi de UEA. Tiu premio estis fondita en la Jubilea Jaro 1987 per kapitalo
      donacita de Oomoto por premii agadon de individuo au organizajho, kiu per
      Esperanto antauenigas internacian amikecon kaj solidarecon en la spirito de
      la instruoj de L.L. Zamenhof kaj Onisaburo Deguchi. La premio konsistas el
      diplomo kaj monsumo de 2000 euroj.

      En 2000 la Estraro de UEA aljughis la Premion Deguchi al s-ro Rob Moerbeek
      el Nederlando pro lia longtempa agado helpe al triamondaj esperantistoj
      kaj por handikapitoj, precipe blinduloj. Dum multaj jaroj li faris tion
      kune kun sia edzino Nora, forpasinta en 1998, konata aktivulo de la blindula
      Esperanto-movado. Profesie Rob Moerbeek jam ekde 1969 laboras en la Centra
      Oficejo de UEA.


      * * * * * *


      SUBVENCIO CIGNO AL INDIGHENAJ DIALOGOJ

      Ekde 1994 la Estraro de UEA asignas Subvencion Cigno al projekto, kiu
      kontribuas al disvastigho de Esperanto en la Tria Mondo. La subvencion
      financas la japana esperantisto Etsuo Miyoshi kaj ghi valoras 500 000
      japanajn enojn (ch. EUR 4900).

      La chi-jaran subvencion ricevis la projekto Indighenaj Dialogoj, lanchita
      antau du jaroj kun la celo krei komunikan reton inter organizajhoj de
      indighenaj popoloj per la uzo de interreto kaj Esperanto. Tiu chi komplete
      novspeca projekto estas ne nur unu el la plej kuraghaj sed ankau unu el
      la plej sukcesaj Esperanto-rilataj projektoj de multaj jaroj. Ghi ne estas
      movada projekto, char la disvastigo de Esperanto ne estas ghia celo sed
      rimedo por realigi la celatan komunikan reton. La projekton iniciatis
      ges-roj Bessie Schadee kaj Sylvain Lelarge el Nederlando. Kadre de ghi
      okazis jam du kursoj en Nederlando kaj regionaj kursoj en Barato, Kostariko,
      Burkina Faso kaj Rusio (Komilando). UEA auspicias la projekton ekde la
      komenco.


      * * * * * *


      HEJMA VORTARO REPRESITA

      En la Tel-Aviva UK estis venditaj la lastaj ekzempleroj de la unua eldono
      de "Hejma vortaro", aperinta en oktobro pasintjare. Dum nau monatoj estis
      venditaj 703 ekzempleroj. Sekve "Hejma vortaro" superis alian furorajhon,
      la ZEO-libron "Monumente pri Esperanto", kies debito en la unuaj nau
      monatoj post la apero estis 644 ekz.

      Por ke la populara libro estu konstante achetebla, UEA represis senshanghe
      la unuan eldonon. "Hejma vortaro" estas do daure havebla por la prezo de
      7,50 euroj. Per ghia vendado oni apogas la agadon de Rondo Familia, kiu
      estas komisiono de UEA por kunligi familiojn kies hejma lingvo estas
      Esperanto.


      * * * * * *
    Your message has been successfully submitted and would be delivered to recipients shortly.