Loading ...
Sorry, an error occurred while loading the content.

Huck Finn 12

Expand Messages
  • Gary Miller
    Debi es proxi a mono horo, kron na fini kine ultra nesia. U plankto-navi feno veri tardi kine. Es boni, un hetero navi a na pa veni, kausa na ne pa puta moti
    Message 1 of 1 , Jun 29, 2013
    • 0 Attachment
      Debi es proxi a mono horo, kron na fini kine ultra nesia. U
      plankto-navi feno veri tardi kine. Es boni, un hetero navi a na pa
      veni, kausa na ne pa puta moti u pafili-me ad Indiana navi, alo u
      piski korda alo ali vora-ma. Si plu andro pa kine a nesia, mi puta;
      mu pa detekti u piro; mi pa face, e skope id un holo noktu, kaso Jim
      fu kine a la.

      Kron di proto foto line monstra se, na liga bi navi ad areno-lo ko
      poli dendro Populus, e seka plu rami per skizo-ru, e tegu u
      plankto-navi per mu. Per-co es u vista; pa es u tera kade-in topo
      litora la.

      Es plu monti epi Missouri-stato litora e densi silva epi
      Illinois-stato litora. Kausa-co na ne fobo; ali-pe fu detekti na.
      Kausa-co Jim face u te-do epi plankto-navi; na pote kumbe infra tem
      fo-termo alo pluvi meteo, e tende tena seka plu ra. U noktu bi, na du
      plankto inter sep alo ok horo per flu, qi kine ma tako de sixa
      kilometra per horo.

      Panto noktu mi kine kripti a litora proxi a deka horo topo mikro viki,
      e merka 10 alo 15 centi farina alo sui-abdomina karni alo hetero
      vora-ma. Plu matina pre di foto, mi kripti kine a plu zea agri e
      prende u meloni alo zea alo plu tali ra.

      U noktu penta ultra Sankti Louis, na gene u mega tempestu po meso
      noktu ko forti bronto e flasc. Plus-co u pluvi fo-dura veni. Po mega
      tem, mi dice: “Sti atenta, Jim, vide a la!” Es u vapo navi, qi pa
      gene ruina anti petro. “Na fu kine in id, Jim.”

      Anti-co Jim proto este anti u-la. An dice: “Mi ne volu akti vani in
      ali ruina ra.”

      Mi dice: “Es zero-ra; este monito de, excepti un ofici-pe somni-do e
      direkti-do. Plus-co qe tu puta; uno-pe fu sio cepti u morta risko de
      bi tali domi tem tali noktu; id fu probabili gene frakti tem, e
      plankto longi fluvi ali-kron?”

      Jim mikro kritici. Anti-co an dice akorda. Na kripti kine longi u
      klina plano a laevo in skoto a somni-do, tem tardi palpa per pedi, e
      tensio per manu tende detekti plu tena korda, kausa pa es tali skoto,
      na ne pote vide mu. Na gene es ante u porta de kapitana, qi es
      ge-aperi, e, O! Tele in somni-do atri na vide u foto! Na iso-kron
      audi plu silento voka!

      “Ne akti u-ci, mi bi ami! Mi dice u jura; mi ne dice de u-ci!”

      Mi este forti interese. Plus-co mi dice a se; Tom Sawyer ne nu sio
      fugi. Po-co in la mi vide un andro; kumbe epi pedi-lo, e ge-liga topo
      bi manu e pedi, e bi andro, qi sta supra an. Mono ex mu habe in manu
      u laterna ko debili foto, e u bi u manu fusili-me. Un andro epi
      pedi-lo tenta kripti se, e dice: “O, place ne, Bill— mi fu dice
      zero-kron plu info.”

      Bill dice: “Jake Packard, mi volu cide an.”

      “Fusili es boni. Anti-co es plu ma silento mode, se pe nece akti
      u-ci. Kausa-co mi dice; ne fu es ma mega de bi horo, pre u ruina navi
      gene frakti e gene moti longi flu. Qe tu logi? An fu gene a kata.
      Plus-co an fu habe zero-pe; an pote dice etio anti, excepti se.”

      Po-co mi proto kine. Mi fugi ex la ko frigi soma hidro, e dromo ad ante.

      “Tako, Jim. Es zero kron de fatuo e kritici. Es u grega ex plu
      cide-pe in la. Plus-co, si na ne cerka mu navi, e sti; id plankto
      longi flu, iso mu ne kine ab navi ruina, es mono ex mu, qi fu es in
      kako cirka-sta. Tu sti; u plankto-navi—”

      “Plankto-navi? Id pa gene laxa, e kine ab ci! Plus-co na du es sura ci!”
    Your message has been successfully submitted and would be delivered to recipients shortly.