Loading ...
Sorry, an error occurred while loading the content.

2472Huck Finn 8

Expand Messages
  • Gary Miller
    May 26, 2013
      Un heli es tali alti, kron mi gene es vigi, mi puta; id es po horo
      okto. Ben, mi itera somni, kron mi doxo; mi audi u mega soni “BUM!”
      anti flu. “BUM!” Mi vide leuko fumi veni ex u trans-navi latu. Sti
      logi; mu pafili kanona trans-supra hidro, tende sti; mi soma leva ad
      ana.

      Mi este mega fami. Anti-co es vani, mi proto u piro, kausa mu posi
      vide u fumi. Ben, kron mi acide puta; mu panto-kron moti hidrargiro
      in plu pani, e sti plankto mu, kausa mu panto-kron kine rekti a
      ge-kata soma, e sto kine la. Kausa-co mi puta; mi skope. Plus-co, si
      uno ex mu plankto a mi, mi fu kapti mu. Es profesio ge-face pani— plu
      pluto-pe vora mu— ne ex zea farina. Mi detekti u boni skope-lo inter
      plu folia, e du sedi epi dendro bloka, tem vora plu pani e skope u
      trans-fluvi navi, ko boni sati. Mi sti piro u pipa, e mega-tem fumi,
      e du skope. Po mega tem, id kine proxi, e plankto tali proxi, mu sio
      pote lase u taba, e ambula a litora. Panto-pe dice de u cide.
      Anti-co u kapitana sti sto, e dice:

      “Sti vigi. U flu es maxi proxi a ci. An pa posi plankto a litora, e
      gene involve inter plu densi fito topo hidro margina.”

      Panto mu kine proxi ad alelo e klina se supra manu raila, proxi a mi
      facia, e ne moti se per holo forti. “Sti tele sta!” Ko-co u kanona
      face tali explode ante mi, id apo mi audi-pote, e lase proxi no-vide
      mi kausa fumi. Mi puta; mi es morta. Kron mi kine para u nesia
      ante-lo, mu sto pafili, e plankto a stato-Missouri litora, e kine ad
      eko civita.

      Poste mi gene solo-este. Kausa-co mi sedi topo litora, e audi plu
      flu, e numera plu astro e plankto xilo e bloka navi; qi kine ko flu.
      Po-co mi sti somni. Iso-co tri di e noktu.

      Mi puta; mi fu casa proxi a la, tende gene karni. Mi tako kine, e
      subito detekti plu cinera ex noktu piro, qi ankora dona fumi.

      Kron mi re-kine ad auto topo, mi ne habe koragi. Anti-co mi dice;
      u-ci es zero tem de non-ergo. Kausa-co mi moti panto piski kapti-ru
      in navi, tende tena mu ex vista. Po-co mi sto u piro, e bali peri la
      plu cinera, tende feno es pre-anua topo. Po-co mi skende u dendro.

      Mi puta; mi pa es in dendro bi horo. Anti-co mi vide zero, e audi
      zero— mi simpli DOXO; mi sio audi e vide posi kilo ra.

      Mi kine in silva, e kuko u vespera vora, e decide; mi fu resta la un
      holo noktu, kron mi audi PLONKETI-PLONK, PLONKETI-PLONK, e dice a se;
      plu equs kine a ci. Po-co mi audi plu homi voka:

      “Na debi spende u noktu ci, si na pote detekti u boni topo.”

      Mi ne boni pote somni. Poste mi dice a se; mi ne pote habe tali bio.
      Mi fu detekti; qo-pe es topo nesia ko mi.

      Po-co, sufici sura, mi detekti u mero vista de piro, tele dia plu
      dendro. Po-co, mi es sufici proxi tende vide; la es un andro epi
      tera. U-la proxi kausa u rabi in mi. Po mikro tem, an somni stoma, e
      tensio se, e bali ab se u tegu. Es Jim de sra.Watson!

      “Saluta, Jim!” Mi salta a la.

      An subito sta, e rabi skope mi. Po-co an kade a bi genu, moti uno
      manu ad alelo, e dice:

      “Ne sti noku a mi- ne sti! Mi zero-kron pa akti uno noku anti spiritu.”

      Ben, mi po mikro tem sti; an logi. Mi ne es morta. Mi este mega hedo
      de vide Jim. Mi dice ad an; mi ne este u fobo; an fu dice panto-pe;
      mi es topo qo.

      Po-co na kine a topo; mi navi es la. Po-co, tem an face u piro, klari
      topo ko gramini inter plu dendro, mi prende plu farina e sui karni e
      kafe, plus u kafe-va e patela, plus sukro e plu stani tasa. Po-co un
      Afrika dulo mega laxa se, kausa an puta; panto-ra es kausa magika.

      “Tu pa acide veni a ci per qo mode, Jim, plus tu pa kine a ci per qo mode?”

      “Posi, mi ne debi dice. Anti-co tu ne fu dice info de mi, si mi dice
      a tu, qe, Huck?”

      “No-bene, si mi fu dice, Jim.”

      “Ben, mi fide tu, Huck. Mi— mi pa FUGI.”

      “Jim!”

      “Anti-co sti memo; tu pa dice; tu ne fu dice un info— tu ski; tu pa
      dice; zero info, Huck.”

      “Ben, mi pa dice. Mi es un honesti homo. Pe fu posi dona a mi u
      nomina Apo-dulo-pe, e este non-honora anti mi kausa mi silento.”

      "Cefa seniora- u-ci es sra. Watson— fe panto-kron du komanda a mi, e
      akti sub no-boni a mi. Anti-co fe panto-kron dice; fe ne fu vendo mi
      topo civita Orleans. Ben, uno noktu, mi kripti kine a porta
      fo-po-kron, plus u porta es proxi no-klude. Po-co mi audi; cefa
      seniora dice a lose-sponsa-fe; fe fu vendo mi topo Orleans, anti fe ne
      volu vendo. Anti-co fe fu pote gene 800 dolara pro mi, plus u-ci es
      tali mega qantita valuta, fe ne pote dena.
    • Show all 3 messages in this topic