Loading ...
Sorry, an error occurred while loading the content.

كام كلمه على جنب

Expand Messages
  • SABRINA ABU ALI
    كام كلمه على جنب آسفه...مجتش فرصه أقول لكم كل سنه وإنتم طيبين وبكل خير بس ربنا يعلم إنى
    Message 1 of 1 , Sep 1, 2008
    • 0 Attachment


      Explore the seven wonders of the world Learn more!
      Your message has been successfully submitted and would be delivered to recipients shortly.

      كام كلمه على جنب

       آسفه...مجتش فرصه أقول لكم "كل سنه وإنتم طيبين وبكل خير" بس ربنا يعلم إنى بقصدها من قلبى بكل معانيها وأكتر.

      وكمان كان نفسى أبعتلكم الرساله دى قبل رمضان بس جالى دور برد إيه... وصــاااايه، حاجه كدا عطس على كحه على سخونيه ودموع من عينى ومناخيرى لما بقيت ماشيه اخبط فى الجدران وجالى ارتجاج فى المخ من العطس.. ربنا يعافيكم جميعاً ويعافينى.

      المهم... طبعاً انتوا عارفين اننا ناس Analytical وإلا مكناش بقينا فى Group Analyse This ودا معناه اننا لازم "نحلل" كل حاجه بتمر علينا ،الكويس نكرره ونستفيد منه والوحش نتعلم منه وما نعيده تانى؛ ولأنى لى ملاحظات وتجارب كتــيـييير على "رمضان" إللى فات والرمضانات اخواته فى السنين الفايته وفى حاجات غاظتنى موت فكان لازم أنقلها لحضراتكم، مش من باب "النصيحه" علشان ما تكون تقيله عليكم ولكن من باب "عرض التجربه" يمكن تتكرر مع حد فيكم ويحب يجرب الحلول بتاعتى.

      اعتبروها كام كلمه كدا عالماشى هؤولهم على جنب علشان ما يعطلوكوا.

      الكـــلـــمــه الأولـــى

      ودى بوجهها بشكل خاص "للبنات والستات" إللى بيروحوا يصلوا التراويح وممكن القيام فى المساجــد:

      أنا متأكده انه شعور رائع لأنى جربته مره فى حياتى كلها وما كررته تانى وهؤول لحضراتكم أسبابى أو ليه انا بعارضه حبتين رغم انه "ممكن واحتمال " يكون ثوابه أعلى من الصلاه فى البيت

      سيدنا محمد عليه الصلاة والسلام قال " لا تمنعوا إماء الله من الصلاه فى المساجد" لكنه بردو قال حديث تانى معناه انه "خير صلاه للمرأه فى قعر دارها" يعنى ابعد مكان فى بيتها او غرفة نومها وبعيد عن الناس وعيون الرايح والجاى. والحقيقه ان الحديث التانى هو الأولى بالتطبيق فى عصرنا الحالى مع إللى بنشوفه من "طوفان" البنات والستات فى الشوارع فى ليل رمضان

      صحيح معظمهن ملتزمات ومحجبات لكنهن فى النهايه "بنااات" وخروجهن للصلاه فيه كذا مأخَذ عليهن. ماما بتحاول تقنعنى بالخروج للصلاه معاها فى المسجد لكنى مقتنعه تماماً بوجهة نظرى وهلخصها لحضراتكم

      البنات بيحبوا يخرجوا مع بعض "شله" يعنى يتصلوا ببعض ويتجمعوا عند بيت واحده فيهم ويروحوا المسجد، وطول الطريق "الشله" تكبر يعنى ممكن تبدأ بإتنين وتنتهى بعشرين. كرنفال بنات ماشى فى الشارع وكل واحده لها شكل ولون حتى العبايات بقت زينه فى حد ذاتها ألوان وتطريز وبهرجه وأشكال مختلفه للفة الطرحه وممكن واحده تحط أكسيسوريز او حتى تلبس دهبها كله وهى خارجه ؛يعنى بردو زينه وكله لفت نظر. وهم ماشيين بقا مع بعض الأمر ما بيسلم من كلمه هنا وتعليق هناك وضحكه او ابتسامه  عالماشى ونقابل حد ما كنا شفناه من زمان "نصرخ" من الدهشه او الفرحه وأحضان وبوس وسلامات وصوت عالى و.... ممكن كمان يتمشوا يبصوا على المحلات وهم راجعين او واحده تكون عاوزه تشترى حاجه وكلهم يروحوا يونسوها، كل ده وهم "بنات" لوحدهم فى الشارع بالليل حتى لو الهدف الاساسى هو الصلاه. ولو فرضنا ان واحد من اخوات البنات دول حب يوصلهم بردو ميصحش، دا سيدنا محمد عليه الصلاة والسلام كان واقف مع عمته السيده"صفيه" ولما الصحابه شافوه راح فسر لهم الامر وقال انها عمته وقال كمان "اتقوا مواطن الشبهات" انا مش هعلق يافطه ان اللى بيوصلنى دا يبقا اخويا يا ناس.

      تروح المسجد بقا تلاقى المصلى بتاعة الستات شئ لا يمكن وصفه إلا ما رحم ربى، غالباً الأمهات والجدات بتروح بأطفالها الصغيرين يعنى سيرك فى الصلاه، دا يصرخ ودا يعمل حركات تضحك ويتخانقوا سوا وكله يتشتت فى الصلاه وممكن تلاقى الإمام بينادى فى الميكرفون من تحت "يا جماعه إللى معاها طفل تسكته ميصحش كده". كمان وقت الخروج بيختلط الحابل بالنابل وكله على كله ومش بعيد واحد وواحده معندهمش ضمير ولا أخلاق يكونوا واخدينها حجه علشان يتقابلوا،أنا آسفه..بس بعض الوقائع مؤلمه ومقززه.

      الصلاه فى البيت كدا تبقا أكرم وأثوب ليكى، مع نفسك او حتى تجمعى اتنين تلاته من صحباتك او قريباتك وتصلوا جماعه، حشمه، من غير لبس وخروج وتأخير فى الشارع. بحس بخشوع واندماج اكبر ،وممكن أصلى بجزء واتنين والحمد لله.وممكن فى الاستراحه بين كل ركعتين او اكتر بردو تقرى فى المصحف. بعد الصلاه بتحسى انى "مستسلمه" للتيار الدينى جواكى؛ مش عاوزه حاجه غير تغمضى عنيكى وتبتسمى فى سكينه وكأن الكون كله فضى عليكى لوحدك علشان تناجى ربنا براحتك. موود مش هتخرجى منه اول ما تخطى برا باب المسجد واندماجك مع الرايح والجاى ودوشة الشارع.

      دى تجربتى ووجهة نظرى... صلاتك فى "قعر" دارك قد تكون أكثر ثواباً واعلى أجراً من الصلاه فى المسجد حتى لو عملناها بنية التوسيع على الرجال وعدم مزاحمتهم وكمان عدم "فتنتهم" ومحدش يؤولى "لأ" ،بيحصل حتى لو بدون قصد.

      الكلمه التانيه

      دى بقا "لــلــكـل"ولاد وبنات ،رجاله وستات، ومتعلقه بصديقى اللدود...التليفزيون:

      بيتعمدوا فى رمضان يزودوا جرعة المسلسلات والبرامج وكأن شياطين الجن بتتسلسل وشياطين الإنس بتنطلق علينا نيابه عنهم غالباً بنضعف أؤودام برنامج أو اتنين مع مسلسلين تلاته كمان وندمنهم لآخر الشهر ونقول إحنا احسن من غيرنا إللى ما بيفوتوا شئ. هؤول لكم انا عملت ايه علشان اتعالج بقالى سنتين والحمد لله وربنا يتم على السنه دى كمان وغيرها لو لى عُمر

      أول حاجه تعملها انك لما تشوف اعلان اى برنامج او مسلسل "بص له بسخريه"،آه بجد، اسخر منه وقول له " بكره تتعاد على كل الفضائيات ويقرفونا بيك..اصبر على الحامى تاكله بارد" ودا فعلاً اللى بيحصل، المسلسل يمكن يتعاد 9 مرات فى اليوم دا لو اتعرض على 3 قنوات "بس" وكل واحده بتعيده 3 مرات فى اليوم يعنى خنقه. الحاجه التانيه "عود نفسك تقرف منهم" بجد حاجه تقرف، كل المسلسلات فيها مشاهد مقرفه، وستات تناست انهن مسلمات وكت وحمالات ومايوهات كمان، وفى رقاصات وناس بتشرب حاجات وحشه كمان، يعنى الملايكه طالعه نازله ترفع صحائف الاعمال وحضرتك بتتفرج على معدومى الأدب والأخلاق...يصح كده؟؟!!! وبرامج هايفه ومسخره ما بيستضيفوا غير اشباههم وناس لا يعنونا فى شئ وتقعد تتفرج وتضحك...يا حلاوتك يا جمالك.

       نقول انك رجعت البيت بعد صلاة العصر ممكن تمسك المصحف تقرا فيه شوى او نعمل مقرأه زى ما قلتلكم السنه الفايته وبعد كدا نروح نحضر الافطار. ممكن تجيب على قناه دينيه وما تحول عنها، هنحط الفطار ونروح نصلى المغرب ونرجع نفطر والقناه بردو شغاله وممكن تصادف وربنا يكرمنا ببرنامج مفيد وقت الفطار يا دوب هنفطر ونلحق نجهز نفسنا لصلاة العشاء والتراويح، الرجاله بيخرجوا للمسجد بدرى علشان يلحقوا مكان والستات ترتب مكان الفطار وتغسل الاطباق عؤبال العشاء ما تؤذن ،تروح تصليها وتقرا فى المصحف شوى يرجع أهل البيت ممكن يتلموا ويحكوا مع بعض شوى ولو حد حب يصل رحمه ويزور قرايبه او يكلمهم فى التليفون يكون خير وبركه. على 10-11 بالكتير يكون كله نام علشان نصحى قبل الفجر بساعه او اكتر يعنى حوالى 3 صباحاً نصحى نصلى القيام ونقرا فى المصحف ونصلى الفجر وننام ونصحى على ميعاد الشغل فى منتهى النشاط، من غير سهر وإجهاد وكسل.....جربوها ومش هتندموا ان شاء الله.

      الكلمه التالته

      لأصحاب الأعمال والشركات ومسؤولى العلاقات العامه:

      كتير بتفاجئنى وبتصدمنى دعوات من فنادق كبيره او بعض الشركات انهم يبعتولى دعوه "فطار جماعى" فى "خيمه رمضانيه" وبيكونوا فى منتهى الفخر وهم بيكتبوا ملحوظه فى الدعوه " باند شرقى " =رقاصه وفقرات حتى موعد السحور!!!!!!! مش عارفه اقول ايه؟ بس مره ما قدرت امسك نفسى انى اتصل بالجهه المنظمه واقول للمسؤول عنها " انت بتتكلم جد ولا بتهزر؟؟!! دا طبعاً وسط كلام كتير ملهوش لازمه. عييييييييييييييييييب.إستحى..خيمه رمضانيه ايه؟؟ هو عبط ولا استهبال ولا جهل ولا استهانه ولا اييييييييه؟؟!! قال فقرة تنوره وباند شرقى قال!! ناقص يقولوا فرقه روسى. لو كل واحد جتله دعوه زى دى تجاهلها او انكرها وانتقدها صدقونى مش هيكرروها تانى.

      الكلمه الرابعه

      إلى ربات البيوت...زى الست صفيه المهندس ما كانت بتقول

      ماحبكش يعنى تعملى الكحك فى آخر أيام رمضان، ميبقاش الناس سهرانه تقيم الليل وحضراتكم يا هوانم متجمعين تنقرشوا كحك وتتكلموا وتضحكوا طول الليل لحد السحور، هاتوا الكحك جاهز، اعملوه بالنهار، او الايام اللى ما فيها صلاه، المهم ما تضيعوا ولو ليله فى كلام فارغ والله اعلم تتكرر ولا لأ..دى فرصه، تخيلوا ربنا سبحانه وتعالى نازل السماء الدنيا يستجيب للدعاء ويقضى حوائج الناس واحنا ملهيين فى كحك وبسكويت وبتيفور وقرايبهم.....حاجه تكسف.

      الكلمه الخامسه.....

      بردو لكل الناس...

      العزومات معموله لـ"التحبب والتودد" بينا وبين بعض واننا نفتكر اللى نسيناهم، مش للتفاخر وإحراج الاخرين وإبهارهم وخراب الميزانيه، تفضل الست تعمل اشكال وألوان طول اليوم وفى الآخر بنشبع من كوباية العصير والتمره وطبق الشوربه، ومحدش بيحب الاكل البايت،يعنى هيترمى ويتعمل غيره. مش هؤولك غير ان...رمضان شهر تقشف وزهد وتقوى، عيب علينا إللى بيحصل دا والله.

      يا ريت تجربوا تعزمو حد يتيم او غلبان من الشارع او الشغل، مش لازم نعزم إللى لنا "مصالح" عندهم بس او حتى قرايبنا واللى "من مستوانا" بس...فاهميين طبعاً

      الكلمه السادسه والاخيره

      لكم ولى انا كمان

      لو ترجع بذاكرتك لزى اليومين دول هتلاقيك قلت لنفسك نفس الكلام ؛وعدتها ومنيتها بنفس الوعود،..هتغير للأحسن، هفضل كدا بعد رمضان نمفيش تليفزيون واغانى وسهر، ومفيش ومفيش وهعمل وهعمل وترجع ريما لعادتها القبيحه القديمه

      الجو الروحانى بتاع رمضان بيطغى علينا، بعضنا كمان ما بيستمر فيه لآخر الشهر..... مش قصدى اكسر مجاديفكم، بس قصدى نكون اكثر صراحه مع نفسنا ونعقد العزم والنيه بجد مش كلام بتاع وقته ويروح ليلة العيد فى سهره تمسح كل إللى فات

      اعتبر رمضان هو ميلاد جديد لكrebirth وأبدأ ربى نفسك على إللى تحبه يكون فيك وحبيته فى غيرك واتمنيت زيه فيك

      اوقات بحس انى "منافقه" جداً واتكسف من نفسى لما ما بعرف اجاوب عن سؤالها المعتاد...هو ربنا إللى فى رمضان مش هو ربنا إللى فى باقى الشهور؟؟؟

      آه..قبل ما أنسى،، حاولوا تحطوا فى التوقيع بتاع الاميل كلمات زى "استغفر الله، سبحان الله وبحمده، لا إله إلا الله" هتاخد ثواب وهتدى غيرك

      كالعاده...الكام كلمه بقوا كام صفحه..وشكلكوا اتخنقتوا وزهقتوا ،حقكوا على    

      Sabrina Abu Ali
      C my blog


       

       

        

       

      Analyse This ! 

       

       رمضان يجمعنا

       

      Click to join Analyse_This_

      Click to join Analyse This    أدخل ايميلك لتصلك رسائل المجموعة  

      Analyse This ! Facebook 
       
      Subscribe to Analyse This
      Click to join Analyse_This_