Meänmaan avisin toinen numero on jo valmisteluvaiheessa. Meänmaan avisi on
toinen meänkielinen avisia joka jo toisessa numerossa on päätetty painaa 50
000 kappaletta. Teema on Merkkivuosi 2009. Se kuitekki meni sentähenki
huomaamaatta ohi minuriteettitraportin jonka minurieeettiyhistys jätti
Lääninhallitukselle ja valtiole. Meänkieliset ei näytä tietävän ette on
olemassa meänkielinen avisi joka kilpailee jopa norrlänskan kansa ja on
selvästi suuriin avisit Tornionlaaksossa, kuitekki toinen numero.

Emmä toela luppaa 50 000 kappaletta joka kerta. Mutta tälle Merkkivuoele
pittää kunnola kunnioittaa yhteistä ja vanhaata kieli- ja kulttuurialuetta
jota meän valtiot ja heän maanrajat ei ole pystynheet jakamhaan vaikka on
yrittänheet tehhä sitä noin 150-200 vuotta. Nuot meänkieliset on
ittepäisemät kun suomensuomalaiset. Niihin ei pysty milhään valtion
kielipulitiiikka eikä minkhäänlaisia määräyksiä

Meänmaan föreeninki on saamassa kotisivun missä tehhään reklaamia yhteisestä
avisista ja prujektista ja ittestä föreeninkistä. Jäsenet tulevat molemin
puolen Meän väylää koko Meänmaasta. Tullee näinä aikoina parempi stryktyyri
kaikheen ja alethaan tosihomhaan.

Saapi nähhä jos tämän Meän valtio sitten tukeaa yhteistyötä poikki
Meänväylää!? Vain piian yrittää hindrata ja topata sellaisia försöökkiä?
Kyllä se saatta käyvä niin ette net vieläkin estävät sellaista puuhaa. Se
minuriteettiraportti kyllä viittaa siihen suunthaan.

Ikävä se olis jos jouvuma merkkivuoen puitheessa valittamahaan Meänmaan
avisissa Meänvaltion vähemistötyötä, työ joka estää kehittämhään uuesti ja
yhistämhään vanhaata kieli-ja kulttuurialuetta. Toivoma viishautta!

Myymä anonsipaikkoja ja kyllä siiihen kunnon artikkeliakin haluthaan jos on
kiinostusta markkinoittea omma taitoa. Mutta vain meänkielelä eli suolmeksi.
Ummikokieltä ei hyväksytä.


Terhveisiä
Birger Winsa