Þessi tölvupóstlisti er ætlaður öllum þeim sem hafa áhuga á heimspekilegri samræðu með börnum. Þátttakendur á listanum koma úr ýmsum áttum: kennarar á öllum skólastigum, heimspekingar og foreldrar. Tilgangur listans er að efla tengsl milli þessara aðila, leita leiða til að auka veg heimspekinnar í íslenskum skólum og miðla hugmyndum, námsefni og öðrum upplýsingum sem geta hjálpað heimspekikennurum í starfi sínu.

Heimspeki með börnum á upphaf sitt í Bandaríkjunum en hefur dreifst um allan heim og m.a. verið stunduð á ýmsum vettvangi á Íslandi síðan í lok 9. áratugarins. Meginmarkmið starfsins er að styrkja gagnrýna, skapandi og umhyggjusama hugsun barna og unglinga. Þetta er gert með því að setja á fót samræðufélög þar sem þátttakendur leggja fram eigin spurningar og kryfja þær í gagnrýninni samræðu. Heimspekin býður ungu fólki upp á margvísleg umræðuefni sem þeim þykir bæði skemmtilegt og mikilvægt að glíma við. Dæmi um hugmyndir sem reglulega eru ræddar í heimspekilegum samræðufélögum eru: Hvað er vinur? Hvernig get ég vitað hvort ég veit eitthvað? Hvað er draumur og hvað er veruleiki? Hvað er tónlist? Hvað er réttlæti? Af hverju...?