arabia434 : Message: بين ألة الزمن والتنورة في وكالة الغوري

{{{ ومن يتق الله يجعل له مخرجاً و يرزقه من حيث لا يحتسب }}}

هدفنا مجتمع من الأصدقاء يحب ويساعد بعض . معاً في السراء والضراء .. نتحاور .. نتبادل الأراء .. نختلف ولكن نبقي أصدقاء .. أساس حواراتنا المنطق والحقائق والأدلة .. وليس الإنفعال والحدة .. فهدفنا رفعة أمتنا العربية .. من أجل مجتمع أحسن ببشر أفضل .. قوةّ ويدّ واحدة لكي نبقى قلوباً في قلبٍ

السلام عليكم ورحمة الله وبركاته

أصدقائي الأعزاء

جميع القلوب

بين ألة الزمن والتنورة في وكالة الغوري عشت حلم من أحلامي

إمبارح أخدني التفكير من غير ماأشعر لسؤال وإجابته .. السؤال لو سألني أي حد إيه الإختراع اللي كنت تتمني إن فعلا ممكن حد يخترعه .. يعني الإختراع اللي ممكن يخترع من الأخر .. وكانت إجابتي بلا تردد هو ( ألة الزمن ) ..

طبعا آلة الزمن تاخدك لوراء ولا لقدام .. المهم تسافر عبر الأزمنة ..

ولنفس السبب ده مازال شغفي بالأفلام اللي باتفرج عليها لما تكون القصة عبارة عن رحلة عبر الزمن .. بس أنا تفرق معايا فكرة السفر للزمن الماضي جداً .. عن السفر للمستقبل بآليته وديناميكيته والتكنولوجيا المتقدمة اللي بتفقد البشر إنسانيتهم .. شغفي بالسفر للزمن اللي كان .. زمان عصور وعصور ثرية في كل الشئ .. كل شئ متكلف وذو عمق .. ساعات لما تتفرج على فيلم قديم من أفلام الخمسينات الأبيض والأسود بنحس إن نفسنا ندخل جوا التليفزيون ونعيش اللحظات دي والزمن يرجع تاني ونعيش وسط الناس الرايقة دي .. ومصر مثلا وشوارعها عريضة وواسعة ونضيفة والعمارات مبنية بمزاج عالي والزخارف منقوشة على كل ركن فيها من برة ..الغرف لو دخلتها مثلا تلاقي السقف عالي ..

إيه رأيكم بقي لو قدرنا نسافر لأبعد من الخمسينات .. يمكن كمان نرجع لأيام الرسول الحبيب ونتملي بنوره ... الله الله الله ..

وعشان ده كله بأحب قوي لما أقضي ساعات ولحظات بين جدران الحسين ومصر القديمة وشارع المعز لدين الله وغيرها وغيرها من الجدران بالحجارة الطراز القديم زي بتاع شارع المعز ولا أسوار القلعة

وفعلا قضيت أمسية سريعة يوم السبت الماضي بين جدران وكالة الغوري في حفل فرقة التنورة للتراث.. صحيح هي أعيد ترميمها .. وشوية بأحس إن جدرانها مع إنهم حاولوا تكون بنفس الطراز القديم لكني بأحسها منمقة زيادة عن اللزوم .. لكن الشبابيك المشربية أو نافورة الفسيفساء الجميلة في منتصف الساحة شئ رائع وفعلا بيخرجك من يومك ويدخلك في لحظة بين صفحات التاريخ .

دي القاعة اللي كان فيها العرض وعلى أحرف النافورة الفسيفسائية جلست

وكل دقيقة بين الجدران وإنت بتتأمل جمال المكان وعبق الزمان بتلاقي نفسك بتسترجع في لحظات سرحانك كل أحداث التاريخ اللي قرأيت عنها واللي فاكرها .. مش قاعدة بتكون أحداث مترتبة في ذاكرتك صح .. لكنها لقطات من كل حدث قرأت عنه أو شفته في فيلم أو سمعته من أستاذك في المدرسة أو غيرهم من عشاق التاريخ .

لما وصلت وكالة الغوري ودخلت ساحة العرض .. كانت الساحة كاملة العدد والعرض بدأ .. كاملة العدد بالمعني الحرفي والمجازي وكل المعاني .. الناس على الكراسي وعلى الأرض .غالبيتهم أجانب .. من كل الجنسيات الحقيقة ..

الصور التالية هي صور جدران الوكالة من الداخل .. بشبابيك المشربيات والحجارة المصقولة ذات الألوان الهادئة

مازلت أحلم أعيش في بيت في الحسين ولا شارع المعز ويكون على الطراز القديم زي جدران الوكالة ويكون بشبابيك المشربية وغيرها

بدأ العرض بالمجموعة دي من العازفين .. وكان كل واحد بيتقدم خطوات ويعزف منفرد وبقية العازفين بيعزفوا سنيدة له .. وكان العازف الكبير ده كبير الفرقة .. وكان أنهماكه في اللعب بالصاجات كظابط للإيقاع لبقية المقطوعات

شد إنتباهي بشدة

في البداية كان بععض العازفين كما هو واضح بالصور .. تباروا سوياً في العزف .. ,اظهروا الكثير من المهارة مما شد إنتباه جميع الحاضرين وإستحقوا التصفيق المبتهج بما ينشروه من إحساس جميل

بعدها دخل بعض المتصوفة يدورون حول أحدهم مرتديا التنورة ذات الألوان البراقة المبهجةوهو يلف لمدة 20 دقيقة متواصل .. وهم يدورون حوله في حركات متصوفة وهناك من أخذ في الإنشاد الديني مناجاة لله ووصفا لحب رسول الله .. وكان راقص التنورة يدور وهو يكرر كلمات المنشد ويرفع يديه للسماء مناجيا الله بكلمات الأنشودة

ثم جاءت مجموعة خري من العازفين

وفي النهاية دخل مع العازفين ثلاثة راقصين التنورة .. كل منهم يرتدي ثلاثة تنورات من فوق بعض .. وكل تنورة منهم يدور بها ويأخذ في عمل تشكيلات بها . ثم يخلعها في نفس وقت الدوران ويبدأ بالتي بعدها وهكذا

إلي أن إنتهم منها جميعا

وفي النهاية وقف الجميع مصفقين لهم وإنتهي العرض .. وخرجنا جميعاً .. لتعود بي ألة الزمن لهذا العصر من جديد .. ولا تعليق

مع تحياتي وإحتراماتي
فريدة فراولة

ملفات مفيدة يرسلها الأصدقاء | مواقع هامة | أرشيف الحوارات | إستطلاعات